Sega King Kintalan

Pesanggrahan 29 juli 2010, minggu kiye pemandangan nang desa pesanggrahan kec. Kroya, kab. Cilacap keton sejen, saben umah warga desana ana pepean, pepean mau udu pepean pari utawa gabah, tapi saben umah ngepe sega lewihan, utawa sega king.

Saben wulan sadran nang desa pesanggrahan akeh banget sega king, mergane warga desa pesanggrahan tesih ngugemi kepercayaan kejawen, sing ngajaraken saben wulan sadran kabeh kon pada nganakna kepungan, kepungan dianakna dina senen minggu ke 2 karo minggu ke 3 wulan sadran, tapi akeh-ake-eh pada nyadran minggu ke 2ne, dadine panganan pirang-pirang nganti ora kepangan.

Bisa diomong nek wulan sadran desa pesanggrahan kebanjiren sega king, mergane nek di kumpulna, sega king bisa taker kintal, nang nggone Bu Tuti sing ora kelebu kesepuhan bae sega king ana 20 kiloan, nek nang nggone sing dianggep kesepuhan nang desa Pesanggrahan bisa nganti 50 kiloan, wulan kie pirang-pirang bakul sega king dadakan, sega king didol sekilone 1000 nganti 1200, sega king mau akeh-ekeeh ditekani nang peternak bebek sekang njaba desa.

Sadran Nang Desa Pesanggrahan

Minggu 25 juni 2010,wulan sadran, nang desa pesanggrahan kecamatan kroya kabupaten cilacap sing wargane tesih akeh ngugemi kepercayaan kejawen. Ora kaya dina-dina biasane, dina minggu kie esuk-esuk wong tua, wong nom pada rame-rame ngresiki kuburane sanak sedulure.

Wulan kie wulan sadran, tumrape wong kejawen desa pesanggrahan, wulan sadran dianggep beda karo wulan-wulan liyane. Saben wulan sadran warga desa pesanggrahan mesti nganakna upacara sing diarani nyadran utawa sadranan.

Sadranan kue dilakoni kanggo ndongakna sanak sedulure
sing wis pada ninggal, kejaba kue wulan sadran uga digawe nggo siap-siap ngadepi wulan puasa. Ritual sadran di wiwiti karo resik kubur, bar kue gari dianakna kepungan sadran, saben umah nganakna kepungan sadran, ana sing modele gentenan gole kepungan tapi ana uga sing pirang umah kepungane dikembul dadi siji, kepungan sadran di dongani nang kamitua, karo pak kayim, kamitua tugase ndonga kejawen, kayime ndonga nganggo cara islam.

Sadran uga bisa kanggo ngraketna seduluran, mergane sedurunge dianakna kepungan, bocah-bocah cilik pada dikongkon njujugna panganan maring nggone sedulure, sing diarani munjungi, saben munjungi bocah-bocah kae mau mesti disangoni nang sedulure, dadine wulan sadran uga wulan sing diarep-arep nang bocah-bocah cilik. wong tua prentah anake sing cilik-cilik munjungi karepe men anak-anake sing cilik bisa kenal karo sedulur-sedulure, cara wong jawane jere men obore ora sirep.